Dosye kagezon bal Pòdepè : lapolis arete, lajistis libere

Vandredi premye jiyè pase a, lapolis ak ajan ladwàn nan waf Pòdepè te mennen yon operasyon. Apre polisye yo t’al fouye kay Edy Lafrance, otorite yo te rive sezi 120,000 katouch. Pami yo te genyen 157 kès (114,000 bal) kalib 5.56 pou zam lagè tankou AR15 ak M16, 2,000 katouch kalib 9 milimèt epi 4,000 kalib 7.62 yo mete nan AK-47 ak AKM-59. 

Pandan menm operasyon sa, lapolis te rive sezi 2 9milimèt, yon 38, 30 chajè ak 20 etwi Ak-47. Otorite yo te jwenn 3,890 dola ameriken epi 814,343 Goud tou. 

Komisè gouvènman an nan Pòdepè, Mét Michelet Virgile te deside mete nan prizon Mouche Edy Lafrance epi Fritz Jean Relus, ki te vin pran yon pati nan kagezon an pou konplisite nan trafik ilegal zam. Mèkredi 6 jiyè pase, tout moun te sezi aprann menm komisè sa deside lage mesye sa yo.

Jiskaprezan poko gen anyen ki di ofisyèlman sou dosye sa men Metronome raple nou menm Komisè sa te deside lage, nan mwa avril, yon prezime kidnapè ki te touye yon polisye. Apre liberasyon li, dapre sa menm medya a di, bandi sa retounen nan baz li al fè menm vye aksyon yo.

Dosye kagezon bal sa nan Pòdpe pa depaman ak anpil lòt ki pase nan peyi a. Se toujou menm bagay la, lapolis arete, otorite nan Leta, avoka, jij oubyen komisè lage. Pèp la li menm pa manje pwa men li oblije bay lapire.

Sous:

https://lefiletinfo.com/trafic-darmes-et-de-cartouches-a-port-de-paix-liberation-inattendue-de-deux-personnes-arretees/

https://www.haitilibre.com/article-37058-haiti-flash-saisie-de-plusieurs-dizaines-de-milliers-de-munitions-au-wharf-de-port-de-paix-video.html

Annie FRANÇOIS

A lire aussi

• Pòdepè: ti bwa k ap pete je n nan?
• Port-de-Paix : l'ancien CG Michelet VIRGILE arrêté!

Thèmes associés

• Kagezon bal
• Pòdepè
• Edy Lafrance
• Fritz Jean Relus
• Michelet Virgile