Ekonomi: Bilan yon ane Ariel Henry, se apse sou klou

Mèkredi 20 jiyè pase a sot fè yon lane depi Ariel Henry ak ekip li a ap koupe epi rache nan tèt peyi a. Apre Jovenel Moïse alyas Apredye, se mouche Ariel Henry alyas Tou Puisan k ap fè koze isit. PM nan se sèl kòk chante, pèp la menm pa ka rele, li fin pèdi souf akoz sitiyasyon malouk l ap viv ladan li a.

Soti 20 jiyè 2021 rive 20 jiyè 2022, goud la vin pi fèb devan dola ameriken an. Nan lane 2021, dapre BRH to a te 98 goud pou yon dola. Yon ane apre, se 115 goud li ye. Nan lari a ak kèk lòt enstitisyon bagay la pi mal, se 140 goud pou yon grenn dola.

Sou menm moso tan sa, dapre ekonomis Enomy Germain, ogmantasyon pri pwodi yo soti 12,3 rive 27,8 % sou mache a. Lavi a vin pi chè pandan ensekirite ap vale teren. Anpil moun pèdi travay yo akoz bandi ak zam. Gen moun ki oblije fèmen biznis yo akoz bandi ak zam k ap egzije yo peye gwo lajan pou kite yo fonksyone konsa genyen ki kouri kite peyi a pou ensekirite. San bliye moun nan gran Sid yo ki gen yon ane depi yo pa ka jwenn machandiz kòm sa dwa ni voye vann nan kapital la tou akoz bandi ak gwo zam fann fwa k ap taye banda nan Matisan.

Plis moun vin nan bezwen manje, pandan ekip sou pouvwa a anonse yo pral ogmante pri gaz la. Pil pwojè asistans sosyal yo te anonse yo poko ateri. Grangou ak malsite ap vale teren.

Louvencky FRANÇOIS

A lire aussi

• Haïti-Séisme: 311 tremblements de terre ont été enregistrés en janvier 2022
• Ayiti pran nan konplo! Zòt rayi li pou endepandans 1804
• Ane akademik 2022-2023 : paran nan zòn metwopolitèn Pòtoprens lan gen anpil kè kase
• Ane jidisyè a fini : jistis la toujou malad grav
• Ayiti kriz marinen ak kriz: Yon maleng nou riske pa ka niche!
• Aktivite ekonomik yo ralanti nan mond la, ki espwa pou Ayiti ki an mal makak depi 3 lane?
• Ariel Henry, audace? En-veux-tu, en voilà...

Thèmes associés

• 1 an
• Ariel Henry
• Ayiti
• Bilan