Koup dimond FIFA-Qatar 2022: Kisa ou dwe konnen sou Qatar ki se premye peyi kalifye

Depi aprè koup dimond 2010 ki te fèt nan kontinan afriken an nan peyi Afrique du Sud, rèsponsab FIFA yo ki te gen nan tèt li Sep Blatter te remèt bay Qatar responsablite resevwa 22 zyèm edisyon mondyal la. Malgre anpil plenyen sou fason Qatari yo benefisye òganizasyon bèl fèt sa, ebyen peyi Qatar pare pou resevwa evènman an.

Peyi Qatar se pral premye peyi nan Moyen-Orient ki pral òganize kokenn chenn aktivite foutbòl sa e se premye fwa yo tou nan egzèsis sa. Qatar se yon penensil ki pataje fwontyè li ak Arabie Saoudite. Selon yon seri enfòmasyon ki disponib sou sit entènèt FIFA, sivilizasyon moun yo ale jiska 50 000 lane. Li se yon peyi ki konvèti nan lislam nan setyèm syèk avan ke yo te vin sou pwoteksyon britanik nan lane 1916.

Se yon peyi ki rich anpil epi se gras ak richès yo sitou nan sa ki gen pou wè ak petwòl ke yo vin endepandan nan lane 1971. Daprè yon ankèt an 2021, peyi Qatar vini 2e peyi ki ekspòte plis gaz natirèl likid. Yo gen lòt sous richès tou tankou lapèch ak pèl. Lajan yo itilize nan peyi sa rele riyal.

Qatar gen yon sipèfisi 11 mil kilomèt kare sa ki fè de li 163zyèm nan mond lan nan sa ki gen pou wè ak gwosè. Kapital yo a ki se Doha se yon veritab kote ki atire anpil touris e gen plis pase 2 milyon moun kap viv nan kapital la. Prensipal rezon ki fè koup dimond 2022 ap fè nan peryòd nou site anlè a se paske se sèlman nan peryòd sa tanperati a ka atenn 30 degre sèlsiyis.

Nan sa ki gen pou wè ak match inogiral koup dimond 2022 a, ekip foutbòl Qatar la ki se peyi kap resevwa mondyal la ap gen pou twoke kòn li ak ekip Equateur a. Match sa ap jwe nan yon estad tou nèf ki rele Al Bayt stadium ki genyen 60 000 plas.

Nan pwochen nimewo nou, n’ap gen pou prezante w ekip Equateur a. E sal redaksyon Le Courrier de la Nation ap akonpanye piblik li a pandan tout dire koup dimond lan.

Seide Putnam LOUIS-JEAN

A lire aussi

• Coupe du monde FIFA-Qatar 2022: Menacée d'exclusion, La Tri sera bien de la partie
• Coupe du monde Qatar 2022: La FIFA autorise désormais 26 joueurs par équipe
• FOOTBALL | CONCACAF| Qualification CDM Qatar 2022: Haïti descendue de son petit nuage

Thèmes associés

• Koup di Mond
• Qatar
• Foubòl