Mouche Ariel ou p ap dirije anyen, se pa move nouvèl ?

Chak jou ki pase peyi a ap pi mal. Kriz ki t ap taye banda nan peyi a depi plizyè dizèn ane a vin jeneralize e li vin pran yon fòm nou pa ta imajine. Enstitisyon yo fin tonbe e jodia se bandi k ap fè lalwa. Se vre nou pa konn ak ki Konstitisyon n ap sèvi, se vre anpil pou n pa di tout enstitisyon nan peyi a fin kraze men dapre anpil moun sitiyasyon sa te dwe pito louvri je n, frape konsyans nou epi pouse n aji pou chanje sa. Malerezman se pa chwa sa ekip ki sou pouvwa a fè.

Se vre an Ayiti nou pa gen otrich. Men anpil nan nou, chak fwa nou tande reyaksyon bèt sa devan danje toujou kritike l. Mal chans pou nou yon konpòtman ki pi mal ekip k ap mennen "tranzisyon" sa genyen. Yo pa senpman bouche je yo pou yo pa wè danje a, yo prefere fè kòmsi l pat egziste. Sitou se pa yo k ap viktim.

Deklarasyon mouche Ariel sou prezans bandi yo nan Palè Jistis Pòtoprens la montre n a klè poukisa peyi a konsa. "Pa gen bandi nan Palè Jistis […] w ap bay move nouvèl" se sa PM nan te reponn jounalis Radyo Zénith, Robest Dimache, ki te mande l kisa ekip la konte fè. Poutan tout moun konnen bandi okipe anba a vre. Menm jan Matisan pa bon depi yon lane. Bèlè, Tokyo, San Fil, Kwabosal, yon bout nan Dèlma, Pènye, Kwadèboukè, Site Solèy elatriye se bandi k ap fè lalwa. Anyen pa fèt pou chanje sa tout bon, se petèt move nouvèl pou Mouche Ariel tou.

Ensekirite ap vale teren, lajounen kou lannuit kidnapè ap feraye. Pri manje ap monte. Prèske mwatye nan popilasyon an nan ensekirite alimantè. Depi plis pase yon ane moun pa ka jwenn gaz nan ponp regilyèman. Anyen pa fèt pou aji sou sa yo. PM/Prezidan Ariel Henry tou pwisan pa gen kontwòl anyen. 

Si peyi a pa pi mal pase jan l ye a se pa fot Ariel. Li fè tout sa ki posib deja pou sa. Erezman pou nou gen kèk bagay ki anpeche sa. Men si n pa aji pita ap pi tris. Anpil moun ap mande n swiv egzanp pèp Skri Lanka a, poutan nou pa ka fè tankou yo. Paske sitiyasyon n nan pi grav. Jodia nou dwe, gonfle ponyèt nou pou n chanje sitiyasyon n ak reyalite jenerasyon k ap vini yo.

Jodel ALCIDOR

A lire aussi

• Fondasyon Zanmi Timoun p ap bese bra l
• Gouvènman dominken an pa ekate posiblite pou devye rivyè Masak la
• Enfeksyon, moun kole ak tonbe ansent se kèk danje ki gen nan fè bagay nan dlo
• Sa nou bay pòv se Bondye nou prete l
• Ariel chanpyon!
• Pral gen kouri?
• Ayiti pran nan konplo! Zòt rayi li pou endepandans 1804

Thèmes associés

• Ariel Henry
• Ayiti